|
Back to back belly to belly
Ah don't care at all
For me done dead a'ready.
Back to back belly to belly
In de duppy jamboree.
What that noise me hearing
Coming from out o doah?
Mi get out o' bed pull back de
curtain
An peep out tru de window.
Me rub me yeye an look again,
Can't believe wha me just see,
Twenty seven duppy dere
Staring back at me !
One o dem stand up dere
With him head under him arm,
One o dem is a big ole bull
Like de one pon Granpa farm.
But this one yeye dem full o fire
And it have on one big ole chain
Is a rollin-calf! Me shet me yeye,
Den open dem again
When me hear dem singing.
Me open me yeye wide
Ah think one have a horse head
Growing from him side!
De Devil out deh with dem
With him cow-foot an him horn,
Him long tail wrap right him wais
Him pitchfork in him han.
Lawd him looking up at me!
Him see me! Him a grin!
It look like sey him come
To punish me for all me sin.
Dem comin to de doorway
Me noh ready yet fe dead!
Me fly into me mama room
An jump into her bed.
Yeye-water runnin dung me face
Till me can hardly see,
De duppy dem out o doah Mama
Doan make dem come ketch me!
Mama hold me tight an laugh
Noh mek dem frighten you
Is not a duppy jamboree
Is just de Jonkunnu.
By: Valerie
Bloom
{
Back To Out Loud Poems Index
}
{Back
To Index} |
English SMS
Categories